لحظة وداع

و أما نويت السفر .. سافرت دموع ع الخدود

الدمعة جمــرة بتنحت ع الوش كام أخـــــدود

سيبي الدمـــوع تنزل ما تمسحيش دمعتك

تمسـحها فرحة قلب.. يوم ما الغريب بيعـــود

حلم الخلود

حلم الخلــــــود... لسه عايش في العــروق

و خمـــــر كاسه ...مش ممكن منها أفـــوق

لولاه ما كنت قتلت أخويا اللي تحت

و لا حتى كنت أكلت من الشجـرة اللي فوق

قرصة ودن

لســه الألم في الودان من قرصتك يا امّه
و شد حيلك يا ولد ...ورينا بقى الهمــــة
الصوت بيأنس وحدتي في غربة وجعاني
و أديني مستني عادتك بعد العتاب ضمة

تيه

انت إيه و إزاي و ليه
ياللي عايش جوه تيــه
حك دقنه و هز راسه
و قاللي تقصدني يا بيه

افتح شباك للقمر

الضلام مش كله مرعب
تلقى لون الحبر داكن
و لولا لونه ما كان هيكتب
افتح شباك للقمر
لسه فيه ليل السمر
لسه فيه ذكرى حلوة
قصة فاتت
لسه جوه القلب ساكنة
و ذكرياتها معايا باتت
الجميل فيها البراءة و النعومة
عود يدندن لحن ذكرى
و بالنغم تغني ثومة
بألف ليلة
اسمع كمان
ده صوت ادان
و البلابل راح تزقزق
طب تصدق
الضلام اللي انت خايفه
ايوة عارفه
خلف بابك اللي قافله
فينه راح!!!
لسه شايفه!!!
هِدْ بابك اللي خانقك
تلقى نور الصبح شقشق

أنا أنا

أنـــا أنـــا
و في المرآة
لا أرى غيري هنـــا
أنف الشموخ
حده طرف السماء
و الرأس يعلو
فوق معنى الكبرياء
مرآتي هل ترين بي
الا الكمال بلا فناء
ضحكت و قالت:
شعرتين عن اليمين
و بعض الثنايا بالجبين
و الشيب يدرك ما تبقى من سنين
لا شيء يبقى
الكل يرقي سلمًا للإنتهاء
و كل فخر قلته
غدًا سيحويه الرثاء

نيولوك (بيتنا)

وبيتنا كان أخضر و عمل نيـــولوك

نمسك فيه الحرامي نلاقي غيـــره يفك

بيعنا الحيطان للجيران و برضه ما سلمنا

الدار ما عادش أمان حتى فـ أبويا بأشك